ဝၚ်တ္ၚဲသၟတ်မန် (ဗွဲခမၞောန်)

🌺📜ဝင်တ္ၚဲသၟတ်မန် (ဗွဲခမၞောန်)📜🌺 🌹
ဟိုတ်မဒးစၟတ်သ္ပသမ္တီ တ္ၚဲသၟတ်မန် ယဝ်သ္ၚဳလ္ၚတ်ရံၚ်ဝၚ်ပရေၚ်ဍုၚ်ကွာန်မန်မ္ဂး စပ်ကဵုပရေၚ်ရုန်ဂစာန် ပွမလုပ်ပေဲါဗ္တိုက် သွက်ဗၠးၜးဂကူ သ္ဂောံကလိဂွံ အခေါၚ်အရာကောန်ဂကူတုပ်သၟဟ် ကံကုသိုလ်ဇကု ဇကုဖန်ဖက်ကေတ် ကေုာံပရေၚ်ၜိုဟ်လလမ်မာန်ဂှ် သၟတ်မန်တအ် ပါလုပ်ချဳဓရာၚ်ကၠုၚ်ဒၟံၚ် ပ္ဍဲခေတ်အဆက်ဆက်ဂှ် ဂွံဆဵုကေတ်ဒၟံၚ် ပ္ဍဲကဵုဝၚ်ကၠးကၠးဖ္ဍးဖ္ဍးရ။ က္ဍိုပ်သ္ကိုပ်မန်ညးမလုပ်ကၠုၚ်ဒၟံၚ်ပေဲါဗ္တိုက် ပၠန်ဂတးကၠုၚ်လဝ် သွက်ဗၠးၜးဂကူ ပၠတရဴကၠုၚ်လဝ် ဂၠံၚ်တရဴပရေၚ်ဍုၚ်ကွာန်ဂကူ သၠးကၠုၚ်လဝ်ဂုဏ်ဖိုလ် ဒုၚ်ပူဇဴလဝ်လမျီု သီုကဵုလွဳၜံၚ်ပ္တိတ်လဝ် တၞောဝ်ဒတောဝ်က္ဍိုပ်သ္ကိုပ်၊ သ္ဂံၚ်ခေတ်အဆက်ဆက်တအ်ဂှ် ဒှ်တဴသၟတ်မန်တအ် မွဲအခိၚ်တေံရ။ ညးတအ် လ္ၚဵုၜိုန်ရပြဟ်လလုဲစုတိ ကလိလောန်အာကီုလေဝ် ဂၠံၚ်တရဴညးတအ် လးကၠုၚ်လဝ် နကဵုဆီပဠက်ဂှ် က္ဍိုပ်သ္ကိုပ်ညးမသှ်ေတဴဒၟံၚ်တအ် ဆက်ယိုက်ဂၠေၚ် ဂါမ်ကွာ်အာဒၟံၚ်ဖိုဟ်ရ။ လ္တူညးတအ် ရုန်ဂစာန်လုပ်ကၠုၚ်လဝ်ပေဲါဗ္တိုက်ဂှ် တိုၚ်ပ္ကဴညးတအ် ၜိုန်ရဟွံစိုပ်တရဴဏီကၠာလေဝ် သတ်ကၟဝ်ဇဝ်ပ္ကဴပရေၚ်ဍုၚ်ကွာန်ပရေၚ်ဂကူ မဒှ်အထံက်အရီုကဵုဂၠံၚ်တရဴ သွက်ပရေၚ်ရုန်ဂစာန်ဗၠးၜးဂကူ ၜိုတ်ထေက်ကြိုက် ပိုယ်ကလိဂွံဒၟံၚ်ရ။ ဟိုတ်နူညးတအ် ပၠတရဴကၠုၚ်လဝ်ကဵုဂၠံၚ်တရဴတုဲ လ္တူအာဲကၟာဲအသဝ်ဂုဏ်ညးတအ်ဂှ် သွက်ပိုယ်သၟတ်တၞောဝ်တၟိတအ် နွံကဵုၚုဟ်မး ဒှ်ဂုဏ်ဖဵု သက်ဒးပ္တောံၜတ်ဟွံမွဲရ။ ဟိုတ်ဂှ်ရ သွက်ဂွံရော်ဂုဏ် ပ္တိုန်ဂုဏ်စရာဲညးတအ်ဂှ် ဒှ်တာလျိုၚ်ပိုယ်သၟတ်တၞောဝ်တၟိတအ်ရောၚ် စှ်ေကေတ်စိုတ်သာ်ဂှ်တုဲ ဝၚ်ညးတံချဳဓရာၚ်ကၠုၚ်လဝ် မွဲအခိၚ်တေံဂှ် ဓမံက်ထ္ၜး ပ္တိုန်ဏာဂုဏ်စရာဲကဵုစၟတ်တ္ၚဲ ဗွဲသၟဝ်ဝွံရ။ 🌹ပရေၚ်ချဳဓရာၚ်ဓမံက်ပ္တိုန် တ္ၚဲသၟတ်မန် တ္ၚဲသၟတ်မန်ဝွံ ဒုၚ်သ္ဇိုၚ်ကဵုတၚ်သ္ဂုတ်သွာတ် ပေဲါသၠာဲဂတးလညာတ်သၟတ်မန် (၃)ဝါတုဲ ဓမံက်ပ္တိုန်စၟတ်သမ္တီကၠုၚ်ရ။ 🌳ပေဲါသၠာဲဂတး လညာတ်သၟတ်မန် (အလန်ပထမ) ပ္ဍဲသၞာံ 2007, February 9/10/11ဂှ် ဗော်ဍုၚ်မန်တၟိ၊ ဂကောံသၟတ်မန်လညာတ်တၟိ(MYPO)၊ ကေုာံ ဂကောံစန်ဒက်သၟတ်မန်အလုံဒေသ(LAMYO)တအ် က္ဍိုက်က္ဍိုပ်တုဲ ကၠောန်ဗဒှ်ကၠုၚ်လဝ် ပေဲါသၠာဲဂတးလညာတ်သၟတ်မန် ပ္ဍဲကွာန်ပြၚ်ဗကေတ် ပွိုၚ်ဍုၚ်ရေဝ်သၠုၚ်ကျာ ခရိုၚ်ဓဝဲါ ဗွိုၚ်တိဍာ်သြဇာဗော်ဍုၚ်မန်တၟိတုဲ ပ္တိုန်ထ္ၜး သဳကၠဳဖျေံကၠုၚ်သ္ဂုတ်သွာတ် သွက်သ္ဂောံဓမံက်ပ္တိုန် သ္ပစၟတ်သမ္တီ တ္ၚဲသၟတ်မန်ရ။ 🌳ပေဲါသၠာဲဂတး လညာတ်သၟတ်မန် (အလန်ဒုတိယ) ပ္ဍဲသၞာံ 2009, October 14/15/16ဂှ် ဗော်ဍုၚ်မန်တၟိ၊ ဂကောံသၟတ်မန်လညာတ်တၟိ(MYPO)၊ ဂကောံစန်ဒက်သၟတ်မန်အလုံဒေသ(LAMYO)တအ် က္ဍိုက်က္ဍိုပ်တုဲ ကၠောန်ဗဒှ်ကၠုၚ်လဝ် ပေဲါသၠာဲဂတးလညာတ်သၟတ်မန်(အလန်ဒုတိယ) ပ္ဍဲကွာန်ကွိက်ခွိ ပွိုၚ်ဍုၚ်လှာဒကှ် ခရိုၚ်မတ်မလီု ဗွိုၚ်တိဍာ်သြဇာဗော်ဍုၚ်မန်တၟိရ။ ကၠာဟွံဂွံစိုပ် စၟတ်တ္ၚဲကၠောန်ဗဒှ် ပေဲါသၠာဲဂတးလညာတ် သၟတ်မန််ဏီဂှ် ကမ္မတဳတိုၚ်တအ် ချူတြးလိက် ကုမှာဇန်ဂကောံနာနာတအ် စပ်ကဵုဝၚ်ပရေၚ်ချဳဓရာၚ် ပ္ဍဲစၟတ်တ္ၚဲ December-28ဂှ် သွက်သ္ဂောံသ္ပစၟတ်သမ္တီ နဒဒှ် တ္ၚဲသၟတ်မန်ကီု သီုကဵုအာတ်ကၠုၚ်ကသပ် ညံၚ်သ္ဂောံပ္တိုန်ထ္ၜးနၚ် သ္အာၚ်နူကဵုတ္ၚဲဝွံတုဲ မပ္တံကဵုတ္ၚဲခိုဟ်တ္ၚဲပြဲ မဂပ်ဝ်ကဵုဒးသ္ပ တ္ၚဲသၟတ်မန်ထေက်တအ်ရ။ ပ္ဍဲပေဲါသၠာဲဂတးလညာတ်ဝွံ ရန်တၟံကဵုသၟတ်မန်တအ် သ္ဂောံပံၚ်တောဲ ချဳဓရာၚ်ကၠောန်အာကမၠောန် ပရေၚ်ဒတုဲဖိုလ် သွက်ဂကူမာန််တုဲ ဒက်ပ္တန်ဏာလဝ် ဌာန်ကောံသၟတ်မန်(Mon Youth Forun-MYF) ရ။ သွက်ဂွံရုဲစှ် သ္ပစၟတ်သမ္တီ တ္ၚဲသၟတ်မန်ဂှ် ညးစၞးတအ် ပ္တိုန်ထ္ၜးကၠုၚ် တ္ၚဲစၟတ်သမ္တီနာနာ သ္အာၚ်နူ December-28 မပ္တံကဵု တ္ၚဲဗညာနဲ(ရာဇာဓိရာဇ်) တိုန်နန်တအ် ပ္တိုန်ထ္ၜးကၠုၚ်နွံရ။ သ္ဂောံသ္ပစၟတ်သမ္တီ 'တ္ၚဲစၟတ်သမ္တီ' မွဲမွဲတ္ၚဲဂှ် သ္ဒးသ္ၚဳဂၠိပ်အာဍာ်ဇမၠိၚ်ရောၚ် ညာတ်ကေတ်တုဲ သဘာပတိ ကဵုဏာသ္ဂုတ်သွာတ် သွက်သ္ဂောံရုဲစှ်အာ ပ္ဍဲပေဲါသၠာဲဂတး လညာတ်တေံ မွဲဝါပၠန်ရ။ 🌳ပေဲါသၠာဲဂတး လညာတ်သၟတ်မန် (အလန်တတိယ) ပ္ဍဲသၞာံ 2012,April 24/25/26 ဂှ် ဗော်ဍုၚ်မန်တၟိ ဂကောံသၟတ်မန်လညာတ်တၟိ(MYPO)၊ ကေုာံဂကောံကဵုပညာသၟတ်မန်(MYEO) က္ဍိုက်က္ဍိုပ်တုဲ ကၠောန်ဗဒှ်ကၠုၚ် ပေဲါသၠာဲဂတးလညာတ်သၟတ်မန် (အလန်တတိယ) ပ္ဍဲကွာန်ဝါဗိုၚ် ပွိုၚ်ဍုၚ်ရေဝ်သၠုၚ်ကျာ ခရိုၚ်ဓဝဲါ ဗွိုၚ်တိဍာ်သြဇာဗော်ဍုၚ်မန်တၟိ ရ။ ပ္ဍဲပေဲါသၠာဲဂတးလညာတ်ဝွံ ဒုၚ်သ္ဇိုၚ်ကဵုဆန္ဒညးဂမၠိုၚ်တုဲ December-28 ဂှ် ရုဲဖျေံဏာသ္ဂုတ်သွာတ် နဒဒှ် "တ္ၚဲသၟတ်မန်" နကဵုတၚ်တုပ်စိုတ်ဂမၠိုၚ် ကေုာံ သဳုကဵုဒက်ပခိုၚ်ပ္တိုန်ဌာန်ကောံသၟတ်မန် (MYF) ပ္ဍဲကဵုပေဲါသၠာဲဂတးလညာတ်ဝွံရ။ 🌺📜ဟိုတ်မဒးသ္ပစၟတ်သမ္တီ ပ္ဍဲစၟတ်တ္ၚဲ December-28 နဒဒှ်"တ္ၚဲသၟတ်မန်"📜🌺 ပ္ဍဲသၞာံ 1946. December-28ဂှ် ဂကောံသၟတ်မန် မဒက်ပ္တန်ပကောံလဝ် နကဵုညးလေပ်ပညာဂတာပ်ခေတ် ကေုာံ တခဳသၞာဲဒဴ စတမ်နူကဵု မန်သာန်လှိုၚ်၊ မန်ဗလုန်၊ မန်သိၚ်ထောန်အံၚ်၊ မန်သာန်လှ၊ မန်ၚ္ၚိုဲသိၚ် ကေုာံ မန်မျာတ်ထောန်တအ်ညးဂမၠိုၚ် က္ဍိုက်က္ဍိုပ်တုဲ ဒက်ပ္တန်ကၠုၚ် ဂကောံသၟတ်မန် ပ္ဍဲတ္ၚဲဝွံတုဲ ဗွဲကြဴကၠောန်ဗဒှ်ကၠုၚ်ကောံဓရီုဇၞော်သၟတ်မန် အလန်ကၠာအိုတ် ပ္ဍဲဍုၚ်မတ်မလီု ရ။ တၚ်ရန်တၟံဝွံ ၜိုန်ရဓမံက်ထ္ၜးလဝ် သွက်သ္ဂောံသၠုၚ်ပ္တိုန်ဗလ(၅)သာ်ကီုလေဝ် ကြက်ရှ်သာတိုၚ်ပ္ကဴ တၚ်ရန်တၟံဇေတ်ဇေတ်ဂှ် သွက်သ္ဂောံကလိဂွံ အခေါၚ်သၠးပွး၊ အခေါၚ်အရာကောန်ဂကူတုပ်သၟဟ်ဟေၚ် မဒှ်တုဲ သွက်သ္ဂောံထ္ၜလဘာ်အာ ပရေၚ်ချဳဓရာၚ်ပရေၚ်ဍုၚ်ကွာန်မန် မဒှ်ရ။ သ္ပဟိုတ်ကဵုသၟတ်မန်တအ် စပကောံပကေဝ်ကၠုၚ်လဝ်ဇြဟတ် စချဳဓရာၚ်ကၠုၚ်လဝ် ပရေၚ်ဍုၚ်ကွာန်် ကေုာံ ပရေၚ်ရုန်ဂစာန်ဗၠးၜးဂကူ နူအခိၚ်တေံ ပ္ဍဲတ္ၚဲဝွံတုဲ December-28 ဂှ် မ္ဒးသ္ပဏာစၟတ်သမ္တီ တ္ၚဲသၟတ်မန်ဝွံရ။ 🌹ဌာန်ကောံသၟတ်မန် (𝐌𝐨𝐧 𝐘𝐨𝐮𝐭𝐡 𝐅𝐨𝐫𝐮𝐦)🌹 သ္ဇိုၚ်ချပ်အရာသ္ဂောံဒက်ပ္တန် ဌာန်ကောံသၟတ်မန်ဝွံ နူကဵုပေဲါသၠာဲဂတး လညာတ်သၟတ်မန် အလန်ပထမတေံ စသဳကၠဳချပ်ဓရီုကၠုၚ် ဂကောံသ္ပစၞးကဵု အလုံဂကူမွဲ သ္ဒးနွံထေက်ရောၚ် ပတှ်ေကေတ်လ္တူဂှ်တုဲ စပကောံကၠုၚ် ဇြဟတ်ကၠောံဍအကြာသၟတ်ပိုယ်တအ်ရ။ နူဂှ်မွဲကဆံၚ် ပေဲါသၠာဲဂတးလညာတ်သၟတ်မန် အလန်ဒုတိယ ဌာန်ကောံသၟတ်မန် (Mon Youth Forum- MYF)ဟီုဂှ် ဗွဲမကၠးမး ဒက်ပ္တန်ကၠုၚ်ရ။ ပရေၚ်ကမၠောန််တအ်လေဝ် လးဖျေံကၠုၚ်ရ။ ဆ္ဂး ဟိုတ်နူပ္ၚံက်ပရေၚ်ဍုၚ်ကွာန် အသိၚ်အလိုန် ၂၀၁၀ တုဲ ပရေၚ်ကမၠောန် မလးဖျေံလဝ်တအ်ဂှ် ဓမံက်ကၠုၚ်ရုပ်ရဴဟွံမာန် ပ္ဍဲသၞာံ ၂၀၁၂ဂှ် က္လေၚ်ကၠောန်ဗဒှ်ကၠုၚ် ပေဲါသၠာဲဂတးလညာတ်သၟတ်မန် အလန်တတိယ နူကဵုပေဲါသၠာဲဂတးလညာတ်ဏအ် ထပ်ဖျေံဏာပရေၚ်ကမၠောန် သွက်သ္ဂောံပၠုပ်လမျီု ဌာန်ကောံသၟတ်မန်ဂှ် ရုဲစှ်အာကမ္မတဳကဆံၚ်ကဆံၚ် ကဵု ဌာန််ကောံသၟတ်မန် က္ဍိုက်က္ဍိုပ်တုဲ သွက်သ္ဂောံကၠောန်ဗဒှ်အာ တ္ၚဲသၟတ်မန် အလန်ပထမ ရ။ ဒုၚ်သ္ဇိုၚ်ကဵု ပေဲါသၠာဲဂတး လညာတ်သၟတ်မန် အလန််တတိယဝွံတုဲ ပ္ဍဲစၟတ်တ္ၚဲ 15/16 ဂိတုဂျေန် 2012 ဂှ် ကၠောန်ဗဒှ်ကၠုၚ် ကောံဓရီုပ္ဍဲဇြပ်မန် ဍုၚ်မတ်မလီုတုဲ ရုဲစှ်အာညးတာလျိုၚ် ကေုာံ ကမ္မတဳကဆံၚ်ကဆံၚ်တုဲ သီုဖျေံဏာသ္ဂုတ်သွာတ် သွက်သ္ဂောံကၠောန််ဗဒှ်အာ တ္ၚဲသၟတ်မန် နဒဒှ်ပရေၚ်ကမၠောန် ဌာန်ကောံသၟတ်မန်ရ။ နကဵုဌာန််ကောံသၟတ်မန် က္ဍိုက်က္ဍိုပ်တုဲ တ္ၚဲသၟတ်မန် အလန်ပထမ (ကွာန်ဒဵုထောၚ်) တ္ၚဲသၟတ်မန် အလန်ဒုတိယ (ကွာန်တၟံကၞေၚ်) တ္ၚဲသၟတ်မန် အလန်တတိယ (ကွာန်သၞေဟ်ဗ္ဒဝ်) တ္ၚဲသၟတ်မန် အလန်စတုတ္ထ (ကွာန်ကအ်ဗိန်) တ္ၚဲသၟတ်မန် အလန်ပဉ္စမ (ဍုၚ်မန်တြေံဝါခရူ) တ္ၚဲသၟတ်မန် အလန်ဆဋ္ဌမ (ကွာန်ကၟာမဵု၊ တ္ကအ်ခၟိုၚ်) တ္ၚဲသၟတ်မန် အလန်သတ္တမ (ကွာန်သာံလှေဝ်) ကေုာံကောံဓရီုဇၞော်သၟတ်မန် အလန်ပထမ(ဍုၚ်မတ်မလီု) ကၠောန်ကၠုၚ်နွံရ။ တ္ၚဲသၟတ်မန် အလန်အဋ္ဌမဂှ် ကၠောန်ဗဒှ်ကၠုၚ် ပ္ဍဲ(ပွိုၚ်ဍုၚ်ကျာ်မြဟ်၊ ဌာန-ဗလးဒဵုခရီု)ရောၚ်။ 🌺တၚ်ရန်တၟံ🌺 သ္ဂောံလုပ်အာပေဲါဗ္တိုက် မဍိုက်ပေၚ်ကဵု သွက်အခေါၚ်အရာကောန်ဂကူ ကဆံၚ်တုပ်သၟဟ် မွဲကရောံကု ဗော်ပရေၚ်ဍုၚ်ကွာန်မန်၊ ဂကောံမှာဇန်မန်နာနာ ကေုာံ ညးဍုၚ်ကွာန်မန်။ သ္ဂောံလွဳၜံၚ်ပ္တိုန် က္ဍိုပ်သ္ကိုပ်ပရေၚ်ဍုၚ်ကွာန်အနာဂတ် နဇြဟတ်သၟတ်မန်။ သ္ဂောံသၠုၚ်ပ္တိုန် လညာတ်သၟတ် မဍိုက်ပေၚ်ကဵုကွတ်ပညာဂတာပ်ခေတ်နာနာဂမၠိုၚ်။ သ္ဂောံဒက်ပ္တန်အာဂကောံသၟတ် နဒဒှ်သ္ပစၞးကောန်ဂကူမွဲမွဲမာန်၊ ပရေၚ်ညဳသာသၟတ်ဂှ် ညံၚ်သ္ဂောံသ္ပအဓိကတုဲ ရေၚ်တၠုၚ်အာ။ သ္ဂောံထိၚ်ဒဝ်မၚ်မွဲအာ လိက်ပတ်ယေန်သၞာၚ်မန် ကေုာံ ဝၚ်အခိုက်ကၞာပြဝေဏဳမန်ဂမၠိုၚ််။ 🌺ဂၠံၚ်တရဴ🌺 ဌာန်ကောံသၟတ်မန်ဝွံ ဒုၚ်သ္ဇိုၚ်လ္တူပရေၚ်ညဳသၟဟ်သၟတ်တအ် ကဵု လညာတ်ပရေၚ်ဍုၚ်ကွာန်သၟတ်တအ်တုဲ ပံၚ်တောဲရုန်ဂစာန်အာ ပရေၚ်ကမၠောန်ကောန်ဂကူ နဇြဟတ်အရန်ပရေၚ်ဍုၚ်ကွာန်မွဲကရောံ ကုဗော်ပရေၚ်ဍုၚ်ကွာန်မန်၊ ဂကောံမှာဇန်မန် ကေုာံ ညးဍုၚ်ကွာန်မန်တအ်ရောၚ်။ 🌺လညာတ်ဂမြၚ်🌺 ဌာန််ကောံသၟတ်မန်ဝွံ ပံၚ်တောဲကဵုဇြဟတ်ဗော်ပရေၚ်ဍုၚ်ကွာန်မန်၊ ဂကောံမှာဇန်ညးဍုၚ်ကွာန် ကေုာံ ညးဍုၚ်ကွာန်မန်တအ်တုဲ ရုန်ဂစာန်အာ သွက်ဗၠးၜးဂကူ၊ အခေါၚ်သၠးပွး၊ အခေါၚ်ၜိုဟ်လလမ် နဇြဟတ်သၟတ်တအ်ရောၚ်။ နိဿဲ- လိက်တၞး ပါ်ပရအ်လဝ် ပ္ဍဲတ္ၚဲသၟတ်မန် အလန်အဋ္ဌမ (ဌာန-ဗလးဒဵုခရီု)